"Первый каналдың" тікелей эфиріне соғысқа қарсылық білдіріп атып шыққан редактор Марина Овсянниковаға қатысты материалдар Ресей тергеу комитетінде тіркелді. Бұл туралы адвокат Павел Чиков хабарлады.
Оның сөзінше, бұл әлі қылмыстық іс емес. Тергеушілер Овсянникованың әрекетінде қылмыстық сипат бар-жоғын тексеруі тиіс.
Қазір адвокаттар Овсянникованы іздеп таба алмай жатыр.
Ресей әскерилерінің қоршауындағы Мариуполь қаласында ашылған гуманитарлық дәліз арқылы екі мың жеңіл көлік шыққан. Тағы осыншама көлік қаладан шығуды күтіп тұр. Бейбіт тұрғындар Запорожье қаласына қарай бет алған. Бұл туралы Маруполь қала кеңесі телеграм каналында жазды.
Мариуполь бір жарым аптадан бері Ресей әскерінің қоршауында қалып, қалада үздіксіз атыс жүрген. Мариуполь әкімшілігі қалада кемі 2 мың адам қаза тапқанын айтқан.
Ұлыбритания Ресейдің экс-президенті, қазір Қауіпсіздік кеңесі төрағасының орынбасары Дмитрий Медведевке, Ресей премьері Михаил Мишустинге, Ресей қорғаныс министрі Сергей Шойгуге, Ресей сыртқы істер министрінің ресми өкілі Мария Захароваға, кремльшіл журналистер - Владимир Соловьев, Ольга Скабеева, Антон Красовскийге санкция салды.
Лондон санкциясына бизнесмендер Петр Авен мен Михаил Фридман да ілінді.
Санкция салынғандардың Британиядағы активтері бұғатталады.
Украина президенті Владимир Зеленский 15 наурызда видео арқылы ресейлік әскерилерге қайырылды.
Украина басшысының мәлімдемесінен негізгі циталалар:
- Украинадан ештеңе ала алмайсыздар. Өмірлерді қиярсыздар. Сіздер өте көпсіздер. Бірақ сіздердің өмірлеріңізді де алады. Бірақ не үшін өлімге барасыздар? Білем, тірі қалғыларыңыз келеді. Сіздердің бұл соғыс жайлы, бұл масқара жайт жайлы, елдеріңіз туралы не ойлайтындарыңызды естіп жатырмыз. Бір-біріңізбен әңгімелеріңізді, жақындарыңызға қоңырау шалғанда айтқандарыңызды да тыңдадық. Сіздердің не ойлайтындарыңызды білеміз.
- Сондықтан сіздерге таңдау ұсынамын. Украина халқының атынан сіздерге мүмкіндік беремін. Біздің әскерилерімізге берілсеңіздер, сіздерге адам деп қараймыз. Өз әскерлеріңізде сіздерге олай қарамаған. Таңдаңыздар!
- Біздің батыл отан қорғаушыларымыз Ресей әскерін шығынға ұшыратып жатыр. Жақын күндері Ресейдің құлаған тікұшағы жүзге жетеді. 80 әскери ұшағын, жүздеген танкісін, мыңдаған әскери техникасынан айырылды. Ресей Украинаға басып кіргелі 19 күннің ішінде Шешенстандағы екі соғыспен салыстырғанда көп шығынға ұшырады. Кім үшін?
ПІКІРЛЕР