Forbes журналы Қазақстанда жағдай ушыққан тұста төрт қазақстандық төрт миллиардердің байлығы үш миллиард долларға кемігенін жазды. Ақшасы азайғандар арасында Қазақстанның экс-президенті Назарбаевтың қызы мен күйеубаласы бар.
Азаттық тілшісінің хабарлауынша, 8 қаңтарда Нұр-Сұлтанда қоғамдық көліктер жүріп жатыр, азық-түлік дүкендері ашық. Ақорда маңында күзет қатты.
8 қаңтарда түстен кейін Жаңаөзен қаласында наразылық білдіріп тұрған жұрттың біразы тарады. Алаңда ондаған адам қалды.
Әлемнің әр елінде Қазақстандағы ахуалға байланысты акция өтіп жатыр. 7 қаңтар күні Австрия астанасы Венадағы Қазақстан елшігілі алдында да ондаған жас Қазақстанға қолдау білдірді. Берлинде қаланың орталығында да, Грузия астанасы Тбилисиде де сондай акция өткен.
Қазақстан президенті Қасым-Жомарт Тоқаев күштік құрылымдарға "террористерге" қарсы ескертусіз оқ атуға бұйрық берді. Ал ІІМ елде 3811 адам ұсталғанын, 26 "қарулы адам" өлтірілгенін, 26 адам жараланғанын мәлімдеді. 7 қаңтардағы оқиғаларды топтап шықтық.
Маңғыстау облысында қаңтардың 2-сі күні бейбіт басталған митингіге Алматы қаласының тұрғындары да қолдау білдіріп, қаңтардың 4-і күні кешке шеруге шыққан. Қаланың батыс жағынан орталыққа қарай ағылған мыңдаған адам әкімдік маңында полициямен қақтығысты. Азаттық тілшілерінің көргені қаз-қалпында.
Азаттық журналисі Сәнияш Тойкен Ақтаудағы оқиға орнынан 6 қаңтарда хабарлады. Алаңда наразылар бір-біріне микрофон беріп, сөз сөйлеп жатыр
Чех республикасының астанасы Прагада қазақстандықтарды қолдаған митинг өтті. Плакат ұстап, әнұран шырқаған ондаған адам Қазақстан билігін бейбіт наразыларға күш қолданбауға шақырған.
Азаттық тілшісі түсірген видео Нұр-Сұлтандағы 6 қаңтарға қараған түндегі ахуалды көрсетеді.
Талдықорғанда наразылар бұрынғы президент Нұрсұлтан Назарбаевтың ескерткішін құлатқаны туралы ақпарат тарады. Желіге жарияланған видеода Қазақстан әнұранын айтқан адамдар ескерткішті арқанмен тартып жатыр. Кейін 2016 жылы тұрғызылған ескерткіштің қақ бөлініп жатқан суреті жарияланды.
Қазақстанда билікке ел наразылығы күшейген тұста Ақорда 19 қаңтарға дейін Маңғыстау облысы, Жаңаөзен және Алматы қаласында төтенше жағдай жариялады. Алматыда полиция наразыларға қарсы шулы граната мен көзден жас ағызатын газ қолданғаны хабарланды.
Жаңаөзендегі әлеуметтік наразылыққа қолдау білдірген Ақтөбе жұрты орталық алаңнан 5 қаңтарға қараған түні де кеткен жоқ. Олар алаңға пеш әкеліп, от жағып, киіз үй тігіп, саяси ұрандар көтеріп жатыр.
5 қаңтарға қараған түні Алматының көшесінде мыңдаған адам шеруге шықты. Куәгерлер сөзінше, жұрт қала орталығына қарай бет алған. Полиция кедергі келтірмеген.
Алматының Бауыржан Момышұлы көшесінің бойындағы "Алатау" театры алдына жиналған жұрт Райымбек батыр даңғылына қарай беттеді. Куәгерлер сөзінше, жиналғандар бірнеше мыңға жетеді. Қала тұрғындары Маңғыстау облысындағы наразылыққа қосылатынын айтады.
Әлеуметтік желіде Жаңаөзен қаласында 2 қаңтарда басталған наразылықты мұнайшылардың қолдап жатқаны туралы видео көп тарады. Онда Маңғыстау облысы Қаламқас кен орнының, Атырау облысы Теңіз кен орнының, Атырау қаласы жұмысшылары мен жай тұрғындары тобымен шерулетіп бара жатқаны байқалады.
Жаңаөзенде 2 қаңтарда басталған наразылық бүгін Қазақстанның басқа аймақтарында да жалғасты. Нұр-Сұлтанда полиция пікір айтып шыққан бірнеше адамды ұстап әкетсе, Алматыда белсенділерді жолдан ұстаған.
Тағы